نجوم الفن يدعمون رامي جمال في مرضه: "ممنوع تغيب ومافيش جمال ضعيف"

ما أن أعلن المطرب المصري رامي جمال، إصابته بمرض البهاق الذي يعاني منه ما يقرب من عام، مبديا خوفه من اعتزال الفن بسببه؛ حتى تواصلت رسائل التضامن معه من كل حدب وصوب، تشجعه على الاستمرار في الغناء وتدعمه نفسياً لمواصلة مسيرته.
وقال رامي في منشور له عبر حسابه فيسبوك: "الحمد لله الذي أحبني فابتلاني وقدرني على الصبر، من فترة ظهرت بقع بيضاء في جسمي وبالكشف عرفت أنه البهاق وجربت أنواع علاج كتيرة ودكاترة كتير ومفيش فايدة".

ووجهت زينة، عبر حسابها الشخصي على موقع انستقرام رسالة قالت له فيها: "انسان محترم ربنا يعفوا عنك… للاسف احنا في دنيا مابترحمش والناس بقت صعبه ياريت نحاول يكون في قلوبنا رحمة… انت انسان موهوب يمكن انا ماتشرفتش بمعرفتك بس قلبي معاك واوعي تفكر تتهزم ده مرض عادي وربنا يعفوا عنك وقول الحمد لله والناس الرحيمة كتير واعتبرني من أهلك والإنسان بموهبته واحترامه وأخلاقه وبس".

كما غردت الفنانة إليسا، على تويتر قائلة: "ممنوع تغيب وممنوع يكون البهاق عذرلغيابك أنت بتقول ابتليت بالبهاق، بس مش سبب لتخاف وتغيب فى ناس ابتليت بالكذب والخيانة وماهزت، وجودك أساسي ومثل ما أنت بتقول: أصل الحكاية مش حكاية شكل حكاية روح".

أما حمدي المرغني، فكانت رسالته تحمل الطابع الكوميدي لشخصيته: وقال له: "ربنا يشفيك يا رامي ده مش حاجه أصلا ده الصداع أصعب منه يا خويا الناس كلها بتحبك.. كل ما تشوفني أحمد ربنا وأعرف إنك في نعمة".

ووجهت الفنانة لطيفة، رسال دعم لرامي، قائلة: "حبيب قلبى يا رامى يا مبدع يا محترم يا مختلف، اوعى تفكر كده أول حاجه لازم تقول الحمدالله على كل حاجة، دى مرض حصل لناس كتيروتعالجت منها الحمد الله وبعدين أحنا بنحبك على موهبتك وفنك الرائع وكل جمهورك وأنا منهم بنبقى مستنيين جديدك دايما"، أما الفنان عمر السعيد، قال له:" بحبك زى ما أنت ".

وغرد الفنان أحمد جمال، قائلاً: "سلامتك يا رامي يا حبيبي أولاً ربنا ما بيختارش غير الخير و تأكد ان كل اللي بيحصلنا في الدنيا من تدبير ربنا و رحمته بينا  ثانياً جمهورك اللي بيحبك هيفضل يحبك و مكمل معاك بأي شكل و ف أي وقت".

واختتم جمال رسالته الداعمة مازحاً مع زميلة في الفن وشريكه في الاسم "ثالثاً و ده الاهم مفيش جمال ضعيف كل عيلة جمال جامدين يلا يا بطل انا مستني الألبوم".

كما وجه الفنان تامر حسني رسالة لرامي عبر حسابه على Instagram، كاتبا: "إلى الفنان الكبير والصديق الحقيقي والمحترم رامي جمال يا حبيبي أنت فنان كبير ومحبوب وليك قيمتك وكل الناس بتحبك ومفيش حاجه هتعطلك عن نجاحك، وتعبك دا لا هو مؤذي ولا مُعدي وكل الناس جواها تعب في منه اللي ظاهر وفي منه اللي مش ظاهر حتى لو كان تعب نفسي أو مادي كل شخص جواه وجع من حاجة معينة".

أضاف: "المهم أننا نبص ونتعلم من اللي ظروفهم أصعب مننا ورغم كدا عندهم صبر وبينجحوا في الاختبار وبيقولوا الحمد لله ومكملين وعندهم إرادة وبينجحوا أكتر من الأول لازم تكمل نجاح يا رامي وشيل أي هلاوس من دماغك وإوعى تخبي نفسك.. اللي بيحبك بيحبك لشخصك وفنك صدقني دي حاجه عاديه يا رامي والله ملهاش أي تأثير لا عليك ولا على جمهورك بالعكس بقى أنت أكيد شايف الناس كلها طيبين أزاي ونفسهم يفرحوك".