صور أخطاء تاريخية في "الزيبق" تثير الجدل على مواقع التواصل

وقع مسلسل "الزيبق" لكريم عبد العزيز وشريف منير في خطأ تاريخي أثار الجدل على مواقع التواصل الاجتماعي.

تدور أحداث المسلسل عام 1998، وفي هذا العام فاز المنتخب المصري بكأس الأمم الأفريقية لهذه الدورة، لكن ما أثار الجدل أنه بالرغم من أن الفترة الزمنية التي تدور بها أحداث المسلسل ليست ببعيده، ومن المتفرض أن تكون هذه الفترة أحداثها لها مراجع كثيرة، لكن وقع فريق عمل المسلسل في أخطاء تاريخية.

وقام أحد نشطاء مواقع التواصل الاجتماعي بكتابة تدونة طويلة كشف خلالها عن الكثير من الأخطاء حيث كتب "ماتعودتش اكتب نقد لمسلسل في بوست طويل عريض و صور و الجو ده قبل كده بس فعلا الموضوع سخيف جدا و الاستسهال من ناس المفروض انهم محترفين في الشغلانة دي".

وتابع "في الحلقة التانية من مسلسل الزئبق بتاع كريم عبد العزيز و شريف منير ، مصر فازت بكأس الأمم الإفريقية ٩٨ و الناس نزلت تحتفل في الشارع ... امال ايه المشكلة ؟!
المشكلة أن اي حد بيحب الكورة او حتي فاكر البطولة طشاش هيعرف أن التيشيرتات اللي لابسها الناس في الشارع و هما بيحتفلوا مالهاش اي علاقه بلبس المنتخب ساعتها ، لا الفونت ولا الياقة و لا التصميم ولا اي حاجة خالص ده لو اعتبرنا أن كله اصلا كان هينزل لابس احمر " اللي لبسناه ماتش واحد " مع أن الاساسي بتاعنا ساعتها كان اخضر او تركواز " هو لون مش مفهوم لحد يومنا ده ".

مضيفاً "طبعا ده غير أن في نفس الحلقة اتحبس كريم عبد العزيز ليلة في الحجز و كان جنبه متهم فخور بتخصصه في سرقة الموبايلات اللي لو كان نزل منها مصر ساعتها فمش هيكون عددها اصلا يسمح بأن يكون في تخصص في سرقتها لسه ....
و سبحان الله في نفس الحلقة اتكلموا عن وصلة الدش اللي ظهرت مع كأس القارات ٩٩ و ماكانش في اي مشكلة في كأس الأمم لسه و اتفرجنا عليها علي القناه الثانية عادي جدا ساعتها انا و أبويا بصوت شوبير " يا سلام يا حازم ... يا سلام يا حسام "
السؤال بقي ، ليه فريق عمل كامل عنده خبره و مخ و معاه إمكانيات يكسل يفكر في التفاصيل دي و هو بيعمل مسلسل عن فترة تاريخية سابقة ، و بعدين سابقة ايه ده ماعداش كام سنة مش محتاجة ابحاث يعني امال لو بنتكلم عن الملك فاروق يا جدعان".

مسلسل "الزيبق" قائم على قصة حقيقية من ملف المخابرات العامة المصرية، سيناريو وحوار وليد يوسف وإخراج وإنتاح وائل عبد الله، وهو من بطولة كريم عبد العزيز وشريف منير.